कमान सिंह याम्फु राई

धरान, असोज १९ गते । धरान उपमहानगरपलिका–८ स्थित लाङ्घाली चौकमा मालवाहक ट्रक र स्कुटर ठोक्किँदा एक जनाको मृत्यु भएको छ भने अर्का एक जना घाइते भएका छन् ।

शुक्रबार बिहान धरानबाट इटहरीतर्फ जाँदै गरेको को १ ख ४०६३ नम्बरको मालवाहक ट्रक र इटहरीबाट धरान आउँदै गरेको प्रदेश १–०२–०४५ प ३७४ नम्बरको स्कुटर एकआपसमा ठोक्किएको हो ।

ट्रक र स्कुटर एकआपसमा ठोक्किँदा स्कुटरमा सवार इटहरी–९ घर भएका ४५ वर्षीय आशबहादुर राई र साँगुरीगढी–९ घर भएका घाइते ५० वर्षीय टेकबहादुर राई गम्भीर घाइते भएको थिए । घाइते दुवै जनाको बिपी कोइराला स्वास्थ्य विज्ञान प्रतिष्ठानमा उपचारका लागि पठाइएको थियो । उपचारका क्रममा आशबहादुर राईको मृत्यु भएको जिल्ला ट्राफिक प्रहरी कार्यालय सुनसरीले जनाएको छ ।

अर्का घाइते टेक बहादुरको बिपी प्रतिष्ठानमा उपचार भइरहेको छ । दुर्घटनापछि ट्रक चालक धनकुटा चौबिसे गाउँपालिका–६ का ३० वर्षीय चन्द्रप्रसाद राईसहित ट्रक र स्कुटर प्रहरी नियन्त्रणमा रहेको जिल्ला ट्राफिक प्रहरी कार्यालयले जनाएको छ ।